«Кольыёшурма» — этнофутуризмъя 9-тӥ калыккуспо симпозиум, кудӥз ортчиз Алнаш ёрослэн Усо гуртаз. 
Вуж коркаослэн коръёсыз школа азез тырмытӥзы. «О, та ваньмыз милемлы» шуыса симозиуме пыриськисьёс шумпото. Туэ, та аре, суредаськисьёс но крезьгурчиос архитекторъёслы пӧрмизы. Ми пӧлын кунгож сьӧрысь финъёс вал бере, гурт калыклы тунсыко туж потӥз кадь та ужрад. Огпол мон вӧзтӥ ортчиз пияш, кӧняке юэмын вал ке но, гажаса кадь учкиз шорам но юаз: «Что это будет?» Нош мон учкисько со шоры но уг тодӥськы мар шуыны, ачиз со югыт-горд йырсиё, сыӵе удмурт-удмурт. Мынам аслам уже сярысь вераме но уг пот вал номыр. Малпаськыкум та пияш но малпаськем, мон уг валаськы сое шуыса. Кожаз монэ финн. «Аа, сэнкью» вазиз но кошкиз. Мыным.
12 нунал ӵоже милемлы школа сиськонниын пӧраськыса улӥзы. Нош куатез веганъёс (сӥль сиисьтэмъём) вал. Пӧраськисьёс ваньзэ валаса но чакласа отнеслись талы. Котлет интые соослы кабачки табаын карылӥзы. Вань суредаськисьёслэсь нимъёссэс тодо вал, соос сыӵе шуо: «Мари Леналэн отын шыдэз вань-а ни?», яке «Юсси, ме кут», яке «Тани Паволэн овсянкаез», яке «Тынад Женя нимыд вал ук? Тонэ Азаматысь шуизы кадь».
Быдэс ар куспын таӵе физической ужен ӧй выры. Мукет симпозиумъёсын ведь буёл но дэра гинэ кутылӥськод вал, нош таяз – бадӟым изъёс, коръёс, тӥръёс но лопатаос. Одӥг пол Камдурысь трактор уробоын бертӥ школае. Вунэтӥ вераны: вань арт-объектъёсты пуктӥмы Голюшурма музъеме, кудӥз интыяськемын Усо дорысь 7 иськемын. Отын Кам туж-туж паськыт, кӧняке нюлэсо шормуӵъёсын.
Огез пересь финн (Пааво) нокыӵе но кылэз уг тоды вал кадь, солы кыкетӥ адями пыр берыктылӥзы. Со лэсьтӥз тангыра выллем инструмент, пӧртэм коръёсты гозы вылэ ошылыса. Одӥг пол, аслэсьтым ужме лэсьтыкум, Отто но Жон-Жон со тангыраен шудӥзы корась тӥр куарая, шуккемысь дугдылыкум шыпытгес но шергес шудӥзы. Туж тунсыко кылӥськиз.
Нош малы, пе, Муважиын ортчиз таиз симпозиум? Татысь председатель но ужбергатӥсь Сергеев малпам парк скульптур карыны Кам дурын, сои ник утча вал соосты кин сое пуктысал. Нош этнофутуристъёс инты утчало вал, кытын лэнд-арт объектъёс пуктылыны. Озьыен, соос ог-огзэс шедьтӥзы, яратӥсь туганъёс кадь. Бусыын объектъёс сяна, Голюшурма ошмесэз но выльдытӥзы. Бидерысь Дуэса Ленар но Ари Яра пуктӥзы отчы бадӟым пукыӵ ньӧл, со вылтӥ вуэз изъёс вылэ ваське. Отын чылкыт но чебер каризы на котырзэ, пукон сярысь но ӧз вунэтэ. Кызьы шуиз Сергей Орлов: «Самый главный объект, конечно же, это финский туалет в форме шалаша, там очень удобно и чисто».
эшшо кӧняке туспуктэмъёс…
P.s.
Удмурт дунне газетын статья кадь поттэмын