Быдэс толэзь ортчиз, калленэн. Кӧня пол мон та дыр куспын глинтвейн пӧсьтӥ! Валатэк, ас дыраз котыр вожэктэ, ас дыраз тудву бызе. Нош мон дыртытэк юисько глювайн. Юисько кинэн ке, шӧмзэ шӧдыса, номыре уг ни адӟиськы.
Мон Азаматысь, бускельёсы Ломоносовъёс но Смирновъёс. Бускель гуртъёс: Кузьымгурт, Чем-Куюк, Шайтангурт. Матысь каръёс: Можга, Елабуга, Агрыз. Бускель кунъёс: Эстония, Казахстан, Украина, США но мукетъёсыз. Огпол воргорон юаз мынэсьтым: «Та адямиез тодкод-а Чем-Куюкысь?» Мон «уг» интые верасько, отын 2-3 пол гинэ проездом вал шуыса. Собере малпаськонэ уси, гуртысь тросэс адямиослэсь нимъёссэс ик уг тодӥськы, матысь гуртъёсын но ноку ӧй юмша. Петербургын 3 берпуметӥ гужэмзэ (5-8 нуналъёс) юмшаса ортчытӥ кадь, Мускотӥ проездом 10 пол ини потаськиз. Польшатӥ арганэн шудылӥ. Самолётлэсь шумпотон но, кышкан но ӧвӧл ни.
Да уж, малпанъёс вошъясько, ачид но мукет ини. Дорын гидкуазьмы кузь, кыклы люкемын. Бадӟымаз, кытын улмопуос будо, курегъёс турынлы потыны ик уг сёто. Сюй гинэ. Кылем арын оазис мертти отчы, вож интыез но мед луоз шуыса. Пичи дыръям вань улмопуосмы садын кадь будӥзы, кенер котыртэ вал. Гидкуазь мукет вал. Озьы ке но, тросэз кылемын воштӥськытэк: бекче вуэн сылэ, мама скалэз ӵукна но ӝыт кыскыны пота, уйин пиштӥсь кизилиос но оломарно мукетыз.
Песятае ӧз на адӟы арганэн шудэмме, ачиз пинал дыръяз кыска ке но вал. Песянае куддыръя пыра вал азьло куное (шулдыр луыса ни) но сюлмысьтыз эктылӥз но бӧрдылӥз арганэз кылыса. Эктыны но быгатытэк, сюлэм косэмъя, дыр. Нокыӵе но ӟучъёсты, полякъёсты, французъёсты сюлэмзы уз косы песянайме кадь эктытыны.
Азьло дырез тодэ ваён — дуно луонлык герӟаны астэ та дуннеен. Нош мар луэ «азьло дыр» — каждоезлэн аслаз, умой яке алама, ческыт яке кӧш. Азьло — со не азьло дауръёс, со — тынад ортчем улонэд. Алилы мынам «азьло дыре» — сад-бакчаысь самой ческыт улмоосты лушкем ышкаса сиеме. Нош мон уг тодӥськы мар песянаелэн пушказ, куке со кылэ удмурт эктон гуръёсты…
«Одӥг арбери но кылдэмезъя вошъяськисьтэм ӧвӧл» (с)